Қандай блогпостлар ёзай?

Блоггерларнинг профессионал журналистлар билан фарқлантириш зарурлиги ҳақида кўп ёзилмоқда. Блоггерлар кундалик ҳаётдаги янгиликларга, турли муаммо ва ҳолатларга ўз муносабатини тезкор равишда билдириши билан ҳар бир гапига жавоб беришини ўйлаган ҳолда етти ўлчаб бир кесишга мажбур, агар муаммо ҳақида ёзса, унинг ечимлари ҳақида ҳам фикр билдиришга норасмий бўлса-да ўзида мажбурият сезган профессионал журналистлардан фарқ қилиши алоҳида таъкидланмоқда. Буни енгилроқ тушунадиган бўлсак, блоггерлар жарчи сингари жамиятни янгиликлардан бохабар қилиш, жамият ҳаётидаги турли ҳолат ва муаммоларни оммага ошкор этиш ва уларнинг бу борадаги фикрларини жамловчи жамлоқ вазифасини ўташ керакми? Мен бундай "енгил тушуниш"ни истамасдим.

Блоггерлар ичида турли касб эгалари кўп, жумладан, профессионал журналистлар ҳам. Лекин блог юритганда улар қаерда, қайси вазифада ишлашларидан қатъий назар, ўз шахсий фикрларини билдираётганлари учун ўзларини сал эркинроқ сезадилар. Энг асосийси, ўз нуқтаи-назаридан туриб ёзганларини тахрирлайдиган бош муҳаррир йўқ. (Ўзим ҳам шу сафда бўлганим учун блоггерларга тўғрилан-тўғри мурожаат қилсам бўлаверса керак) Ўзингизга ўзингиз хўжайинсиз. Хоҳлаган мавзуда ўз шахсий фикрингизни билдиришга кенг йўл очилгандай гўё. Лекин "қалтис мавзу"ларда қалам тебратишга иккиланиш бор. Сабаби бундай мавзуларнинг "юк"и оғир. Истасангиз-истамасангиз, фактлар асосида фикр юритишга, ёзганларингизга жавоб беришга мажбурсиз. Муаммони ёритсангиз, ечим ҳақида ҳам сўрашлари аниқроқ.

Нима қилмоқ керак? Умумий мавзулардаги, енгил-елпи богпостларни қаторлаштириш керакми? Ёки жиддий мавзуларни ёритиш учун вақт, имкониятни сарфлаб маълумот йиғиш керакми? Блоггерлик билан қорин тўйдира олмаслигингиз аниқ бўлгандан кейин, асосий ишингиздан чалғиш қанчалар тўғри? Савол кетидан савол...

Менимча, асосий соҳангизга яқин мавзуларда блогпостлар ёзишингиз "олтин ўрталиқ"ни ушлашингизга имкон беради. Танлаган соҳангиздаги катта-кичик мавзуларга ўзига мос тайёргарлик билан блогпостлар тайёрлаш асосий ишингизга ҳалақит берадиган даражада кўп вақтингизни олмайди. Бундан ташқари, журналист тушуниши қийин бўлган соҳангизга оид ньюансларни сиз яхшироқ тушунасиз, демак фикрингиз объективликка яқинроқ бўлади. Тўғри, блогингиз аудиторияси камайиши мумкин, лекин блоггер учун аудиториянинг сони муҳим бўлмаслиги керак. Асосийси, ўз соҳангизга бефарқ эмаслигингиз ва уни ривожлантириш борасида журналистлар катта фронтига ёрдам сифатида "қўшимча фронт" очиб "жанг" қилаётганлигингиздир.

Хулоса

Блоггерлар ўз касб-корлари, ишлаётган соҳаларидан келиб чиқиб ихтисослашган блоглар ёзганлари тўғрироқ деган фикрдаман. Умумий мавзулардаги чуқур маъноли блогпостларни профессионал журналистларга қўйиб берақолайлик.

PS

Олдинги ёзилган блогларни ўчириб ўтирмадим, лекин бугундан бошлаб менинг блогимда ўз соҳамга алоқадор блогпостлардан бошқа блогпостлар бўлмаса керак.